Gal 3 | SWP | STEP | O Galatia eauyauremiu e! Eai i iwalaemiu to riba mamohoina nige au awaabiei, omi matamiu eai Iesu Keriso se hetoro hemasaraha, ia ede se hesatauro wa?

Galatians 3

Earua se ainauiaida, sunuma debana eai, nige laugagaeo paisoana eai.

1 O Galatia eauyauremiu e! Eai i iwalaemiu to riba mamohoina nige au awaabiei, omi matamiu eai Iesu Keriso se hetoro hemasaraha, ia ede se hesatauro wa? 2 Teina mo bena ea hesioimiu: Earua wa omi aue abi laugagaeo paipaisoadi eai, e ataataiena, sunuma eai? 3 Au eauyaure doha nei? Earua arinai au hetubu, abotai abo buluma eai au heohi? 4 Amamna gamagaridi au hearogaibuidi, wa? — ena mamohoi aniodi nige’e. 5 Ia Earua i leawa wa i bobodiemiu, eo laulau gigiboridi boeamiu eai i hetubudi, laugagaeo paipaisoana eai i ginauridi, e ataiena eai, ma sunumana?

6 Doha hinage Aberahama “Eaubada i awamamohoiei, ia arinai se awalaulau dudurai.” 7 Iaede arinai au ita, sunuma tataodi isi ede Aberahama nanatunayao. 8 Uriuri tabudi se itamaodai Eaubada Murimuri‐tataodi abo i heduduraidi sunuma debana eai, evanelia se guguia‐maodai hinage Aberahama arinai, si ene, “Oa debam eai basileia gamagamagari abo se helolodi.” 9 Arinai ede, isi wa sunuma tataodi se helolodi, maedi Aberahama, sunuma tauna wa.

10 Isi gamagaridi laugagaeo paipaisoadi aridi eai se sunusunumalau, isi soradi riba‐hebaaea potadi eai ie ota; paana se uriyao si ene, “Esau, esau, ginauri gamagaridi laugagaeo bukana eai se uridi, nige i miamiaidi e i laulauwataidi, ia se riba‐hebaaea.” 11 I masaraha ariri Eaubada matana eai nige tau esau se hedudurai laugagaeo debana eai, paana “Tau‐laulaududurai sunumana eai abo i mauri;” 12 na laugagaeo paana nige sunuma, doha si ene, “Tau ena i laulauedi mo, abo i mauri debadi eai.” 13 Keriso laugagaeo riba‐hebaaeana eai i lebohaida, paana ia i hemala riba‐hebaaea, ita debada eai — doha si uriyao, “Tau esa se heabasisae oeagi eai, ia se riba‐hebaaeai” (Deu. 21.23)— 14 arinai Keriso Iesu debana eai Aberahama helolona abo i taru Murimuri‐tataodi potadi eai, ita Earua se ribahesunumaei wa abo ta hearo, sunuma debana eai.

15 Egu tataoyao e, ea riba doha tatao edi riba; ena tatao se hai‐ribahesunuma, taiede ena edi riba tohona, taba nige tau esau riba wa i hekuu e i hemotula. 16 Ribahesunumadi wa se ribaedi Aberahama arinai eo pesipesina esau. Nige si ene, “Eo pesipesimyao aridi eai,” doha se gamagari; na esega mo, “Eo oa pesipesim arinai,” iaede Keriso. 17 Egu riba doha ina: ribahesunuma wa Eaubada i ribahetohonaeyao, abotai laugagaeo i laoma murita, borimai handere hasi eo tau‐esega‐i‐mate saudoudoi se lauo, arinai ia taba nige ribahesunuma i helautom. 18 Paana ena ginauri abiabina laugagaeo eai i laoma taba nige ta ’ne ribahesunama eai ta abiabini; ia mo Eaubada i mosei wa Aberahama arinai, ribahesunuma eai.

19 Laugagaeo ne ana paisoa saha? Se hetubu baaea debana eai, i lau e pesipesina wa abo i laoma, ia arinai ribahesunuma wa se ribaei; eo aneru se hetubu, taulaulaubiri awana eai. 20 Esa wa taulaubiri ta atai, ta nuatui tatao hisa abo se laubiri; na Eaubada esega mo.

21 Abo laugagaeo ta ene Eaubada ena ribahesunuma i lauudoiei? Taba nige’e; ena laugagaeo esau se leama gonoana tau i hemauri, abo ta ene laulaududurai laugagaeo eai ta aabi. 22 Na uriuri tabuna ginauri gamagaridi i toredi baaea boeana eai, na ribahesunuma wa Iesu Keriso sunumana debana eai, iaede abo se mosei isi tauawamamohoi aridi eai.

23 Sunuma sora nige i laoma wa, ita laugagaeo boeana eai se tutuguduida, se audidinida, i lau e sunuma abo se hemasaraha. 24 Arinai laugagaeo tauheaheatada ede, i lau e Keriso i laoma, bena ita sunuma debana eai se heduduraida. 25 Na sunuma wa i laomao ina, arinai tauheaheata wa i lautom arida eai. 26 Paana Keriso Iesu boeana eai omi gamagarimiu Eaubada nanatunayao ede, emi sunuma debana eai. 27 Omi gamagarimiu aidobu se hebapatisoimiuo, Keriso ede aue lui. 28 Iudea e Heleni nige’e, tauauau e tauiairihai nige’e, tau eo sine nige’e; paana omi gamagarimiu omi esega Keriso Iesu boeana eai. 29 Na ena omi Keriso enanayao, omi Aberahama pesipesinayao hinage, ena ginauri tauabina omi, ribahesunuma wa debana eai.